證道集

經文: 以斯帖記4:15-5:8
主題: 認清身份所帶來的逆轉

大綱:
1. 逆轉行動一: 尋求上帝
2. 逆轉行動二: 善用恩賜

引言:
當末底改同以斯帖講到猶太人既情況，有幾咁嚴峻，猶太人要滅族既時候。都差不多講到，以斯帖你唔幫既話，我地就一鑊熟咁濟。以斯帖終於醒悟過黎，知道呢件事不單係同猶太人生命攸關既事，亦都係同以斯帖自己性命攸關。因為，以斯帖同樣擁有猶太人既血統同身份。

本來，以斯帖住係皇宮中，enjoy緊做皇后。皇后有咩做，都不外乎扮靚、shopping，做下spa。對於猶太人既信仰，佢可以話，係信仰核心外圍既人，一個outsider。但係，當以斯帖認清楚自己既身份，佢係猶太人，係屬上帝既子民，佢就成為猶太人信仰核心內圍既人，從一個outsider 成為insider。猶太人要滅族呢件事唔再係同佢無關。

唔單止咁，當以斯帖認清自己既屬靈身份，佢就策劃拯救猶太人既行動。睇到呢度既時候，我真係覺得以斯帖就好似superman, super girl咁，當知道自己真正身份既之後，就唔再只係繼續做佢既記者，或者淨係坐office返佢個份朝9晚5既工, 而係肩負起保護同拯救呢個地球既責任。(By the way, 係super girl呢套劇入面既super man就麻麻地靚仔)

內容:
好，我地睇返以斯帖，我地去睇下，當以斯帖認清自己既屬靈身份，佢屬靈生命既改變，帶來一D咩野既行動，而當中對我地有D咩提醒同埋值得我地學習既地方。

係15-17節講到以斯帖吩咐末底改，去call 齊人馬，去為，以斯帖可以順利向波斯王亞哈隨魯求情，唔駛滅族呢件事祈禱。

以斯帖認清自己既屬靈身份，屬靈生命有所改變，帶來第一個行動，就係尋求上帝。

原本以斯帖由細聽從末底改吩咐而行，而家卻係吩咐末底改做野，佢就由被動變主動。吩咐猶太人一齊去祈禱尋求上帝既幫助。係16節咁講:「你當去招聚書珊城所有的猶大人、為我禁食三晝三夜、不喫不喝‧我和我的宮女、也要這樣禁食。然後我違例進去見王。我若死就死罷。」

呢個祈禱一D都唔求其，非常認真，係禁食祈禱3日3夜。3日3夜其實係講到連續性，同樣代表緊個重要性。祈禱既呢事件好重要，重要到唔停得。唔單止咁，以斯帖自己，同埋D婢僕都一齊禁食祈禱。

我地睇聖經，好多時提到禁食祈禱，咁祈禱係咪一定禁食先至會靈D呢?

我地首先了解下猶太人既文化先，因為，猶太人既傳統觀念都會認為災難是因神向人發怒，苦難既出現係神既審判，人激嬲左神，所以，神以家就用苦難黎刑罰人，咁人又點樣激嬲神呢?係舊約約黎講，來來去去都係個幾樣野，一係就拜偶像，一係犯罪。所以，猶太人遇到苦難既時候，好多時都會披麻、散灰、禁食祈禱。禁食禱告當中有表達哀傷，在禱告中認罪，悔改既意思，希望知罪侮改，神就網開一面，叫D災難離開。唔食野，因為沒有心情去享用美食，所以，係第4章開頭，猶太人知道要被滅族既時候，個個都披麻、蒙灰、禁食祈禱，表達緊佢地既哀痛，期望向神認罪悔改，災難會離開。

而係新約方面，都有提到禁食祈禱，主耶穌受試探時都禁食祈禱。不過，我覺得最經典就係馬太福音 17:21，耶穌話有既係，趕鬼係要依靠上帝，食野唔係最重要，飲食都要放埋一邊，要專心依靠上帝。係禁食禱告裡面，表達緊人幾咁軟弱無助，再無別既方法，再無出路，唯有上帝係我地既依靠，唯有上帝係我地既幫助。

即係話，禁食祈禱並不是一種手段或者方法令神能達成自己既心願，而係禁食祈禱裡面，人係神面前醒察自己個心，睇下有無得罪神既地方，求神原諒同赦免。並且飲食都要放埋一邊，要專心依靠上帝。因為，上帝先係我地唯一既依靠同出路。係禱告裡面，放低自己的需要，尊注返與上帝既關係，將上帝擺返係第一位。係禁食禱告裡面，表達上帝係我地唯一既主。

所以，大家唔好攪錯，唔好諗住學足以斯帖咁樣，叫人為你搵工/搵樓/搵伴侶禁食祈禱，咁樣你好想做個份工就會有head hunter搵上門，樓價會大跌你就上到車，你至愛既女神或者男神突然主動date你，唔駛再做兵….係唔會架。如果你禁食祈禱係想求得到女神男神既愛，我相信，係禁食禱告既時候，上帝係會讓你睇見原來她/他不夠愛你，原來你坐後備座。原來最愛你既，只有上帝一個。你死心喇!

係度我地見到，當以斯帖佢認清自己既屬靈身份，佢既屬靈生命隨之而改變，佢第一個行動就係尋求上帝，與上帝建立關係，唔再係信仰既outsider，佢尋求上帝既能力，屬靈既幫助。原本以斯帖係唔可以被人知道佢既身份，要keep silent, 佢以家知道自己既真正身份時，佢卻係keep praying。

以斯帖咁著重祈禱，因為，佢知道最需要既係邊個既幫助。唔係靠波斯王既能力去拯救猶太人，而係依靠上帝既能力，佢尋求既係屬靈的幫助，尊注返同上帝既關係，將上帝放返係第一位。

小總結: 當以斯帖認清楚自己既身份之後，佢屬靈生命有好大既逆轉，並且尋求上帝，與上帝建立關係。

弟兄姐妹，我地認清自己屬靈既身份未呀?如果我地已經認清楚，我地係屬基督，我地既屬靈生命又如何呀?同上帝既關係又係點既呢?如果，我地話自己係信耶穌，係基督徒，但我地既內在生命，從未無經歷被耶穌去改變，又或者我地同上帝既關係仍然係好有距離，好遠，有事先識去祈禱去求佢，其餘既時間，擺係首位既，仍然係自己，呢個”我”係最重要，如果係咁既話，我地係基督教既信仰裡面，仍然係一個outsider。如果我地屬靈生命無咩改變，同神無咩經歷，我地經歷唔到上帝，究竟係上帝唔真實，唔可以經歷，還是我地唔夠重視同上帝既關係。

好鼓勵大家學習以斯帖一樣，有一段長時間係神面前去安靜祈禱。咁又唔駛要3日3夜咁長既。可以一個月一次，搵埋一班弟兄姐妹，一齊去退修，用日半既時間，可以係藉唱詩、讀經、祈禱，安靜係神面前。係安靜既裡面，讓聖靈光照我地既內心，重整我地既屬靈生命。當我地靜係神面前，有咩想同神講，照講，直接講，對生活，對信仰有D咩掙扎，有D咩 click住阻我呢個人去跟從神，去愛主，就係安靜既裡頭同神講。去尋求上帝既幫助。

我以前工作好忙，我係一間做BB仔鞋既公司工作，真係忙到嘔，朝9晚10，有時星期六、日我都會返去做野。但我係好忙既日子裡面，我都一定會搵日去退修，比一段長時間自己安靜係神面前，每次係好忙既日子，一安靜係神面前既時候，一講主呀!我就會喊，或者一唱詩歌，特別講到主既愛個D歌，一唱就喊。因為，每次安靜係神都同我好近，神既安慰，神既同在好真實。老實講，每次安靜之後，神係無改變過我既工作，我工作仍好忙，好多鑊，都係未解決，未處理，我仍然要面對。但每次安靜卻經歷神加力，讓我面對到呢D難處。更重要係，安靜既裡面，神一次又一次提我，工作唔係我人生既全部，提我將工作擺返低D，將上帝擺返首位。

弟兄姐妹，唔知你最近面對緊一D咩既困難，信仰上有D咩掙扎，好鼓勵大家，返到神既面前，去尋求佢既幫助，認清自己既屬靈身份，係神既仔女，因耶穌基督既寶血，我地同上帝已經再無阻隔，可以隨時返到神既施恩座前，去得憐恤、蒙恩惠，作我地隨時既幫助。我相信，當我地願意依靠上帝，我地係能經歷上帝。

我地繼續睇落去，當以斯帖認清自己既屬靈身份，屬靈生命有所改變，帶來既第二個行動。5章第一節咁講: 「第三日、以斯帖穿上朝服、進王宮的內院、對殿站立。王在殿裏坐在寶座上、對著殿門。」

以斯帖佢既改變，不單止於祈禱，依靠上帝，以斯帖認清自己既屬靈身份，帶來第二個行動，就係善用上帝比佢既恩賜。佢憑上帝比佢既權力，皇后既位份去為以色列人發聲。

過左3日既禁食祈禱之後，以斯帖就準備去見波斯王。但係要吸引到波斯王既注意並且得到王既恩準，進前謹見，都唔係一件容易既事。通常要吸引人注意，都係得兩個方法，一就係鬼咁靚(或者型仔)，一就係鬼咁騎呢(夏蕙姨)，但一般人都唔會選用後者呢個方法去吸引人注意既，更何況要吸引個個係皇帝。所以，我絕對相信，以斯帖應該就係揀最靚既皇后衫，應該仲會有咁靚扮到咁靚，全副武裝上陣，希望draw到波斯王既attention，恩準佢可以進前謹見。

當以斯帖全副武裝上陣，果然有效，被波斯王望到佢，向佢伸金仗，示意可以進前謹見。唔單止咁，仲問以斯帖，皇后呀!皇后!你有咩所求，我一定比你，我身家一半都可以比你。

究竟波斯王係咪真係愛妻愛到咁既程度呢?當然就唔係喇，其實波斯王話:「求什麼也給你」，是當時慣常既用語。就好似，有時D人都會咁講:「真係好耐無見，搵日飲茶食飯」。跟住就會話: 「我有你電話， what’s app再約」，最後，就不了了之。「真係好耐無見，搵日飲茶食飯」呢句都係講下既遮。同樣，波斯王話以斯帖求咩都比佢，都係講下既遮，即是你咩都可以求，但唔一定應承。

唔知係咪呢個原因，當王問以斯帖有咩請求既時候，以斯帖無即時向王提出。不過，更肯定既係，以斯帖無即時為猶太人代求請，係另有打算，佢要更有智慧地去計劃及部署，以致佢向波斯皇為猶太人作出請求時，一定係萬無一失。

當波斯王應承以斯帖，真係帶埋哈曼去筳席既時候，筵席既當晚，波斯王又再問同一條問題，但係以斯帖都係無講，仲要去第二次既宴會先講。睇到呢既時候，真係超緊張，真係睇到手掌心都出哂汗，點解仲唔講，好等以斯帖肉緊，好驚王唔再去多次筵席，咁點算呢?不過，我地見到以斯帖佢好冷靜，沉得住氣，以神給佢既智慧，沉著應戰，忍耐等候神既時間。這個忍耐、等候，也成為哈曼的自我、驕傲、自大變得更成熟，我地遲D再睇落去既時候，就知道，哈曼以為自己真係好了不起，連皇后都咁重視佢，一次又一次邀請佢去到皇后既筵席裡面，其實哈曼不知不覺墮入以斯帖為佢鋪既呢個局裡面。以斯帖既延遲係神賜比佢既智慧，呢個既延遲，卻令哈曼返唔到身。

以斯帖認清自己既身份之後，佢唔係淨係掛住扮靚，做佢既波斯皇后，淨係去討波斯王既歡心，力保佢既皇后地位。以斯帖知道自己既屬靈身份既時候，佢就運用神比佢既位份、權力及智慧，為拯救以色列人而計劃一個萬無一失既拯救行動，完成上帝交比佢既任務。

小總結: 以斯帖認清自己既屬靈身份，帶來第二個行動，就係善用上帝比佢既恩賜，完成上帝交比佢既工作。

弟兄姐妹，今日上帝又比左個咩位份我地呢?上帝安放我地係一個咩既位置，而呢個位置裡面，上帝交左個咩工作比我地去完成呢?神放我係呢間公司，我地係咪淨係做好一個文員/sale/司機，還是我地要做一個基督徒。神放我係醫院裡面，我地係咪淨係做好一個醫生/護士，還是我地要做一個基督徒。神放我係學校裡面，我地係咪淨係做好一個老師，還是我地要做一個基督徒。係大學裡面，我地係做一個大學生，還是我地要做一個基督徒。

唔知大家認唔認識佢，唔識，都正常既，佢係我既年代一位好出名既網球名星。張德培十五歲加入職業網球賽，1989年十七歲便贏得「法國公開賽」冠軍，成了有史以來最年輕的大滿貫賽得主，更在ATP世界排名成為第一位亞洲球手達至世界前十名，隨後更攀上世界排名第二名位置。

2003年退出球壇，佢修讀神學，又做教練，佢既徒弟錦織圭一位日本既網球手 (呢個識拿掛，1989年出世，今年未夠30)，2011年張德培同錦織圭係東京相遇，當時佢地兩個出席當年日本大地震災民舉辦既慈善比賽，之後錦織圭更邀請張德培成為佢既教練。係擔任教練既過程，張德培佢唔係淨係教導打網球既技巧，技術，亦從信仰同心態上影響錦織圭。係2014年既美國網球公開賽，賽前，正在傷病中的錦織圭一度想退賽，但張德培鼓勵這個日本青年話：「只要你努力，上帝總會有看到的時候。」個次既比賽，錦織圭雖然負傷，卻得到亞軍，係張德培既指導下，上年錦織圭既實力已在職業男單既五強之內。而係一次既訪問中，錦織圭亦提到，能夠成為張德培既弟子，係上帝既安排。

係度，我地見到，張德培佢唔係淨係做好一個教練既工作，佢仲做好基督徒要做既事，佢善用上帝比佢既恩賜同身份，用佢既生命，將信仰帶比佢身邊既人，影響身邊既人既生命。

弟兄姐妹，作為牧者既我地未必可以進入你既生活圈子，去帶你既同學、朋友、家人認識上帝，除非你帶佢地返黎教會。神擺你係呢間學校、呢間公司、呢個家庭、呢個社區，就只係得你可以接觸佢地，影響佢。如果我地已經做好基督徒本份要做既野，我都唔好灰心，其實我地既生命已經係不經不覺影響別人，當我地做好基督徒既本份，未信既人總有一日係我地身上見到基督，見到上帝。

總結:
鼓勵大家，當我地認清楚我地既屬靈身份，好好同神建立關係，從尋求上帝開始，讓神去帶領，去模造我地既生命更似基督，並且善用上帝比我地既恩賜同身份，用我地既生命影響別人既生命，能夠做到上帝比我既呢個身份要做既事。