「呢D先系最正嘅」——去咗柬埔寨：）

今年青少部主题系Send Us Out Go Your Way，去柬埔寨让我发现上帝会因著各人唔同嘅恩赐带领我哋去 Go Our Way。一团50几人各有各恩赐同功用。当中有叻设计嘅，可以负责整传福音嘅小册子，吸引当地村民；亦有好叻同小朋友玩嘅，好让小朋友藉著玩嘅同时，可感受到上帝嘅爱，毕竟一个拥抱、一个微笑、一下拍手，对佢哋嚟讲都系好珍贵！因为好少人会走近街童或见到佢哋嘅需要。而喺服事里面，我发现𠮶份感动就好似系上帝tailor-made俾我咁。

唔想「跟父母分开」
由细到大我都系一个好钟意同人相处嘅人，好钟意接触唔同人，关心佢哋嘅需要，同佢哋倾计。因为我觉得接触生命嘅工作系可以带嚟好大改变，同时亦系最直接带人返去上帝身边嘅方法。上帝运用我呢个恩赐，带我去柬埔寨，当我见到班小朋友，心里有好大感动。喺中心入面嘅小朋友有饱饭食、有得返学，但我相信世界上冇一个小朋友唔想同父母一齐，但呢度嘅小朋友正正就要同父母分开。佢哋嘅父母有吸毒、有酗酒、有家暴⋯⋯种种原因令佢哋要同父母分开，所以佢哋内心嘅需要好大。

小女孩「揽住黐住」
当时我认识一个10岁叫Lisa嘅女仔，佢俾我嘅印象好深刻，唔似得其他小朋友见到任何人都会揽住黐住，佢由始至终一个星期内都净系拖住我、揽住我、同我倾计食饭瞓觉。甚至乎最后一日我哋带成班小朋友去公园玩，佢都不时望著我，玩到攰啦又好似变返bb咁扭眼瞓、嗲下你。及后知道佢嘅家庭背景及经历，真唔容易⋯⋯曾经以为后父会接佢返去一家团聚，结果系要佢瞓街，唔俾入屋。𠮶刻我就明白，点解每次瞓晏觉佢都好想黐住我，因为当有人俾佢黐住佢就安心好多，好快瞓得著。其实佢同其他小朋友都一样好渴望被看见、好想被关心被爱，好想有人听佢哋讲嘢。

「好有价值」嘅拥抱
上帝让我透过Lisa看到当地小朋友嘅需要，从而更加清楚嚟紧呢一年可以点样同当地宣教士合作开展一啲辅导工作，好好去运用自己嘅恩赐。而最意想不到是，当我以为自己带著上帝嘅爱去拥抱呢个女仔时，原来上帝同时间都透过呢个小女孩每一个拥抱去话俾我知，上帝对我嘅接纳、肯定、同埋爱。当我想透过拥抱话俾Lisa听，无论以前有几困难，佢嘅过去同现在甚至将来都系好值得被爱，因为佢本身就系有价值。然后上帝亦透过呢个拥抱话俾我听，原来我嘅过去现在甚至将来虽有困难，但同样地都系被上帝爱著。而呢个发现绝对系远超过我所想所求！

我哋成日都会觉得Send Us Out 就系要为上帝工作，但其实同时间我哋都会得著提醒，亦会重新经历上帝嘅爱，而我觉得呢啲先系最正嘅！

撰文／Natalie・Gsis (yanfookyouth.org)