信任：由去「柬埔寨」前后讲起⋯⋯

Before the Trip：抱住埋怨、质疑和不服的心态
（就睇吓上帝会俾啲咩野我睇）

有以上心态的原因系因为中五开始，我想我渴望的事情一一都未能实现，当中包括成绩、关系⋯⋯

在我角度，我唔系冇付出，甚至用好多好多嘅努力，去尝试去计划，但永远都冇办法实现。即使尝试让神介入，不断祷告，希望神陪我走过，但结果都系冇一样如我所愿。每一次见到呢啲结果，我都好失望，唔开心。望到周围身边嘅人，佢哋嘅付出都有成果，都可以达成愿望；但我就好似俾人罚 ，觉得呢个上帝根本就系一个好严厉嘅父亲，唔觉得佢系一个满有仁慈嘅上帝。

During the Trip：「相信」原来可以无顾虑
在柬埔寨旅程里面，其实我一直都不停问点解点解，究竟我做错咗啲乜嘢，上帝永远都系同我对著干。我永远都只系得到一啲完全唔系我想要嘅嘢，永远就好似喺度执死鸡，永远都只系得second choice third choice ⋯⋯

我唔系唔知道上帝系为我好，可能我想要嘅嘢全部都对我百害而无一利。喺认知上我唔系唔知道上帝其实好爱我，但事实上我真系感受唔到⋯⋯

但喺问嘅过程中，我再谂返柬埔寨嘅小朋友对于呢个上帝好容易就会选择相信。当中佢哋都唔系话有好多顾虑，有好多嘅揣测，先至会去信。

我又谂返我起初立志相信主嘅时候，其实我都冇谂太多嘢，好单纯就系因为我渴求佢所以我选择相信。

记得喺大专院校课程完结之后，我默默咁筹备柬埔寨旅行嘅经费，当时居然所有part time更期我都报到，结果好快就筹足经费；同时刚刚取录我𠮶份工，面试不足15分钟就得到聘用。如果神只系一个严厉嘅父亲，佢点会俾我过得咁顺畅？

其实呢啲事情嘅发生，就好似上帝话紧俾我听：放心去你嘅柬埔寨，放心去做你嘅社工，呢条路系我开俾你。

上帝好似喺度响紧警号，好似特登俾我睇到一啲野。

After the Trip：交返俾「完全了解我嘅上帝」
我亦听过唔少基督徒分享：如果有弟兄姊妹死都唔信嘅话，上帝通常会整一镬”杰”野⋯⋯谂起我都开始有啲惊。

事实上，我唔系因为畏惧而选择相信神。可能我以往太相信自己，亦有唔少渴望。但经过柬埔寨之旅，我发觉我根本唔了解自己，有好多野我都睇得未够清楚。我相信如果真系俾我得到我想要嘅嘢，后果可能系不堪设想，甚至最后会令我觉得好痛苦。

究竟我应唔应该只继续选择相信自己，定系应该交返俾一个创造我、完全了解我嘅上帝去掌管我未来嘅每一条路。

撰文／Moses（Focus大专组团友）