寻找必寻见

      首先想同大家分享少少关于我成长嘅背景。其实我好细个嘅时候,爸爸妈妈就分开咗，将我交往阿爷阿嫲照顾。虽然係咁，阿爷阿嫲照顾得我好好，甚至乎太纵我。亦都因为咁，我嘅性格慢慢变得叛逆，好似自己想点就点咁，成日发脾气，又成日唔返屋企，喺街度同班朋友流连。即使成日出去玩，我仍然会感到空虚同寂寞，觉得好孤独。尤其是2015年阿嫲过身之后，我就更加觉得呢个世界好似无人爱我，一切都没晒意义。

       但正正係喺我人生最低潮嘅呢个时候，天父向喺幽谷中沉沦嘅我伸出援手。仲记得喺2018年嘅一日，我表妹喺学校带咗个耶稣嘅公仔返黎话送比我，仲话:「耶稣好劲㗎!」咁我就问我表妹: 「有咩咁劲呀? 」佢就竟然答我话: 「你睇!呢个耶稣公仔有六旧腹肌! 係咪好劲呢! 」之后我就Keep住呢个耶稣嘅公仔。

       后来有一日，我好唔开心，唔知点解就醒起表妹送畀我嘅耶稣公仔，脑海中就出现咗耶稣，我开始向神祷告。喺祷告嘅过程入面，虽然我合上眼睛，但我看到一道光，我感觉自己好似俾人揽住咁，感觉好温暖，成个人慢慢平静落黎，感觉好有安全感。

       之后我开始keep住祷告，有一种解释唔到嘅力量驱使我有好大嘅欲望，想去亲近神、认识神，所以我曾经走入不同嘅教堂，独自向神祷告。之后我开始搵教会去了解更多。我又再次向天父祷告，希望全能既主能够带领我去到一间适合我嘅教会。藉着神嘅恩典，有一日同朋友讲起我想搵教会，佢就介绍左我来到 恩福 呢一个大家庭。

       就係咁，我认识神多咗，感受到神嘅爱係信实而又无微不至嘅。神知道我嘅需要，我开始学会交托，将我嘅开心同唔开心同神去分享，慢慢我发觉我膊头轻松咗好多!

       而係神嘅教导同引领下，我开始去除以前嘅一啲坏习惯，例如开始戒烟戒酒，唔再贪玩，价值观亦都改变咗好多， 例如懂得感恩，学晓宽恕别人。喺呢一年入面，我跟随天父嘅旨意，完成佢交俾我嘅功课，例如我完成咗「成长八课」和「主日学」，使我更亲近主和进一步认识神。最近，我参与泰北短宣，向一啲山区嘅儿童传福音，教导佢哋唔同嘅知识。去泰北之前，我有啲担忧自己是否能够胜任这个使命，但天父早已为我哋安排好一切，令我哋嘅旅程非常之平安同充实。而我亦都好感恩，藉着神嘅恩典，我今日可以係度同大家分享我嘅见证，亦可以喺今日受洗，正式成为一位基督徒。感谢主将我嘅不可能变成可能!

      愿主祝福你们! 多谢!