「呢D先係最正嘅」——去咗柬埔寨：）

今年青少部主題係Send Us Out Go Your Way，去柬埔寨讓我發現上帝會因著各人唔同嘅恩賜帶領我哋去 Go Our Way。一團50幾人各有各恩賜同功用。當中有叻設計嘅，可以負責整傳福音嘅小冊子，吸引當地村民；亦有好叻同小朋友玩嘅，好讓小朋友藉著玩嘅同時，可感受到上帝嘅愛，畢竟一個擁抱、一個微笑、一下拍手，對佢哋嚟講都係好珍貴！因為好少人會走近街童或見到佢哋嘅需要。而喺服事裡面，我發現嗰份感動就好似係上帝tailor-made俾我咁。

唔想「跟父母分開」
由細到大我都係一個好鍾意同人相處嘅人，好鍾意接觸唔同人，關心佢哋嘅需要，同佢哋傾計。因為我覺得接觸生命嘅工作係可以帶嚟好大改變，同時亦係最直接帶人返去上帝身邊嘅方法。上帝運用我呢個恩賜，帶我去柬埔寨，當我見到班小朋友，心裡有好大感動。喺中心入面嘅小朋友有飽飯食、有得返學，但我相信世界上冇一個小朋友唔想同父母一齊，但呢度嘅小朋友正正就要同父母分開。佢哋嘅父母有吸毒、有酗酒、有家暴⋯⋯種種原因令佢哋要同父母分開，所以佢哋內心嘅需要好大。

小女孩「攬住黐住」
當時我認識一個10歲叫Lisa嘅女仔，佢俾我嘅印象好深刻，唔似得其他小朋友見到任何人都會攬住黐住，佢由始至終一個星期內都淨係拖住我、攬住我、同我傾計食飯瞓覺。甚至乎最後一日我哋帶成班小朋友去公園玩，佢都不時望著我，玩到攰啦又好似變返bb咁扭眼瞓、嗲下你。及後知道佢嘅家庭背景及經歷，真唔容易⋯⋯曾經以為後父會接佢返去一家團聚，結果係要佢瞓街，唔俾入屋。嗰刻我就明白，點解每次瞓晏覺佢都好想黐住我，因為當有人俾佢黐住佢就安心好多，好快瞓得著。其實佢同其他小朋友都一樣好渴望被看見、好想被關心被愛，好想有人聽佢哋講嘢。

「好有價值」嘅擁抱
上帝讓我透過Lisa看到當地小朋友嘅需要，從而更加清楚嚟緊呢一年可以點樣同當地宣教士合作開展一啲輔導工作，好好去運用自己嘅恩賜。而最意想不到是，當我以為自己帶著上帝嘅愛去擁抱呢個女仔時，原來上帝同時間都透過呢個小女孩每一個擁抱去話俾我知，上帝對我嘅接納、肯定、同埋愛。當我想透過擁抱話俾Lisa聽，無論以前有幾困難，佢嘅過去同現在甚至將來都係好值得被愛，因為佢本身就係有價值。然後上帝亦透過呢個擁抱話俾我聽，原來我嘅過去現在甚至將來雖有困難，但同樣地都係被上帝愛著。而呢個發現絕對係遠超過我所想所求！

我哋成日都會覺得Send Us Out 就係要為上帝工作，但其實同時間我哋都會得著提醒，亦會重新經歷上帝嘅愛，而我覺得呢啲先係最正嘅！

撰文／Natalie・Gsis (yanfookyouth.org)