信任：由去「柬埔寨」前後講起⋯⋯

Before the Trip：抱住埋怨、質疑和不服的心態
（就睇吓上帝會俾啲咩野我睇）

有以上心態的原因係因為中五開始，我想我渴望的事情一一都未能實現，當中包括成績、關係⋯⋯

在我角度，我唔係冇付出，甚至用好多好多嘅努力，去嘗試去計劃，但永遠都冇辦法實現。即使嘗試讓神介入，不斷禱告，希望神陪我走過，但結果都係冇一樣如我所願。每一次見到呢啲結果，我都好失望，唔開心。望到周圍身邊嘅人，佢哋嘅付出都有成果，都可以達成願望；但我就好似俾人罰 ，覺得呢個上帝根本就係一個好嚴厲嘅父親，唔覺得佢係一個滿有仁慈嘅上帝。

During the Trip：「相信」原來可以無顧慮
在柬埔寨旅程裡面，其實我一直都不停問點解點解，究竟我做錯咗啲乜嘢，上帝永遠都係同我對著幹。我永遠都只係得到一啲完全唔係我想要嘅嘢，永遠就好似喺度執死雞，永遠都只係得second choice third choice ⋯⋯

我唔係唔知道上帝係為我好，可能我想要嘅嘢全部都對我百害而無一利。喺認知上我唔係唔知道上帝其實好愛我，但事實上我真係感受唔到⋯⋯

但喺問嘅過程中，我再諗返柬埔寨嘅小朋友對於呢個上帝好容易就會選擇相信。當中佢哋都唔係話有好多顧慮，有好多嘅揣測，先至會去信。

我又諗返我起初立志相信主嘅時候，其實我都冇諗太多嘢，好單純就係因為我渴求佢所以我選擇相信。

記得喺大專院校課程完結之後，我默默咁籌備柬埔寨旅行嘅經費，當時居然所有part time更期我都報到，結果好快就籌足經費；同時剛剛取錄我嗰份工，面試不足15分鐘就得到聘用。如果神只係一個嚴厲嘅父親，佢點會俾我過得咁順暢？

其實呢啲事情嘅發生，就好似上帝話緊俾我聽：放心去你嘅柬埔寨，放心去做你嘅社工，呢條路係我開俾你。

上帝好似喺度響緊警號，好似特登俾我睇到一啲野。

After the Trip：交返俾「完全了解我嘅上帝」
我亦聽過唔少基督徒分享：如果有弟兄姊妹死都唔信嘅話，上帝通常會整一鑊”杰”野⋯⋯諗起我都開始有啲驚。

事實上，我唔係因為畏懼而選擇相信神。可能我以往太相信自己，亦有唔少渴望。但經過柬埔寨之旅，我發覺我根本唔了解自己，有好多野我都睇得未夠清楚。我相信如果真係俾我得到我想要嘅嘢，後果可能係不堪設想，甚至最後會令我覺得好痛苦。

究竟我應唔應該只繼續選擇相信自己，定係應該交返俾一個創造我、完全了解我嘅上帝去掌管我未來嘅每一條路。

撰文／Moses（Focus大專組團友）